Монгол Улсын хэтийн төлөв, хөгжил, дэвшилтэй шууд холбогдох Тавантолгойн орд газрыг ашиглах үзэл баримтлалын асуудлыг УИХ ид хэлэлцэж байна. УИХ-аас Тавантолгойн асуудлыг хаврын чуулганаар багтаан шийдэхээр зорьж буй. Харин зарим гишүүн улс орны ирээдүйтэй холбоотой чухал асуудлыг хэтэрхий яаруу шийдэх нь буруу гэж үзэж байна.

Хоёр жилийн өмнө Монголын эдийн засаг хямарч банк санхүүгийн салбар хүнд байдалд орсон. Тэр үед Засгийн газар, УИХ-ын гишүүд цоожтой хаалганы цаана хуралдаж иргэдийн хадгаламжид төрөөс баталгаа гаргаж хуульчилсан. Гэвч хуулийн цоорхой эрсдэл дагуулж байгаа учраас нэмэлт, өөрчлөлт оруулахаар Засгийн газар төсөл санаачилж парламентад оруулсан юм. Эдийн засгийн байнгын хороо өчигдөр хуралдаж Банкин дахь мөнгөн хадгаламжид баталгаа гаргах тухай хуульд нэмэлт оруулах хуулийн төслийн хэлэлцэх эсэхийг шийдлээ.

Монгол Улсын Ерөнхийлөгч зарлиг гарган АНУ-ын Монголч эрдэмтэн Жак Уэтэрфордыг Монгол Улс, АНУ хоорондын найрамдалт харилцаанд оруулж буй үнэтэй хувь нэмэр болон Монголын түүхийг дэлхий нийтэд таниулан сурталчилж буй зүтгэлийг нь өндрөөр үнэлж “Найрамдал” медалиар шагнав.

Монгол Улсын Ерөнхийлөгч зарлиг гарган, монгол бичгийн албан хэрэглээг нэмэгдүүлэхээр болов. Үндэсний эрх чөлөөний хувьсгалын 100 жилийн ойг угтаж, үндэсний монгол бичгээ сэргээн хэрэглэх төрийн бодлогын хэрэгжилтийг идэвхжүүлэх зорилгоор гаргасан уг зарлигт Монгол Улсын Ерөнхийлөгч, Улсын Их Хурлын дарга, Ерөнхий сайд болон Засгийн газрын гишүүдээс гадаад улсын адилтгах төвшний албан тушаалтанд илгээх албан бичиг, захидлыг монгол бичгээр үйлдэж, орчуулгыг тухайн улсын эсвэл НҮБ-ын албан ёсны аль нэг хэлээр хавсарган илгээж байхаар тогтоосугай.

Монгол Улсын Ерөнхийлөгч Цахиагийн Элбэгдорж БНХАУ-ын дарга Ху Жинтаогийн урилгаар 4 дүгээр сарын 28-аас 5 дугаар сарын 3-ны өдрүүдэд БНХАУ-д Төрийн айлчлал хийнэ.