Япон улс НҮБ-ын гишүүн болжээ

Дэлхийд хөгжлөөрөө тэргүүлдэг Япон улс 1956 оны энэ өдөр НҮБ-ын гишүүн болжээ. 1956 он тус улсын түүхэнд нэлээд чухал үед тооцогддог. Учир нь аравдугаар сард тус улс ЗСБНХУ-тай харилцаагаа хэвийн болгох тухай гэрээнд гарын үсэг зурсан юм.

Ийнхүү Халхын голын тулалдаанд ялагдсанаас хойш Зөвлөлт улстай нэлээд ээдрээтэй байсан харилцаа нэг хэсэгтээ л тайван болж, япончууд ч дайнд нэрвэгдсэн улс орноо сэргээн босгох ажилд илүү анхаарах болжээ.

Япон нь дэлхийн Засгийн газар гэгдэх энэ байгууллагын гишүүн болсноос хойш 50 жил өнгөрлөө. Энэ хугацаанд НҮБ-ын нөлөө бүхий гишүүдийн нэг болсон гэхэд болно. НҮБ-ын Аюулгүйн Зөвлөлийн байнгын бус гишүүн тус улс нь Азид төдийгүй олон улсын тулгамдсан асуудлыг шийдэхэд чухал үүрэг гүйцэтгэдэг юм.

Үүний нэг жишээ нь БНАСАУ-ын цөмийн хөтөлбөрийн асуудлаарх зургаан талт хэлэлцээрт орж байгаагаас гадна улс, дэлхийн халуун цэг гэгддэг Иракт Японы цэргүүд алба хааж байгаа явдал юм.